ഋതുമതി

==========
" അമ്മേ.." ഉറക്കത്തില്‍ നിന്നും ഞെട്ടിയുണര്‍ന്നു അശ്വതി മോള്‍ വിളിച്ചു

" എന്ത് പറ്റി അച്ചൂ..? വല്ല സ്വപ്നോം കണ്ടു  പേടിച്ചുവോ മോള്‍ ..? "

മകളുടെ മുഖത്തെ ഭാവഭേദങ്ങള്‍ വായിചിട്ടെന്നവണ്ണം അമ്മ ചോദിച്ചു.

" ഹും.." അവള്‍ തലയാട്ടി കൊണ്ട് മൂളി...

" ആട്ടെ... ന്റെ മോള്‍ എന്താ കണ്ടേ... ഇത്ര പേടിക്കാന്‍ മാത്രം..? "

കുടിക്കാന്‍ കുറച്ചു വെള്ളം കൊടുത്തു കൊണ്ട് അമ്മ ആരാഞ്ഞു..

അച്ചു വെള്ളം കുടിചൊന്നു ശ്വാസം വിട്ടു നിശബ്ദമായി ഇരിക്കുന്നത് കണ്ട്

" എന്തായാലും അമ്മയോട് പറ മോളെ... നല്ല കുട്ടിയല്ലേ... "
അമ്മ മോളെ മാറോടു ചേര്‍ത്ത് ചോദ്യമാവര്‍ത്തിച്ചു.

അപ്പോഴും അച്ചു കണ്ട സ്വപ്നം ആലോചിചെടുക്കാന്‍ ശ്രമിക്കുകയായിരുന്നു...
സ്വപ്‌നങ്ങള്‍ എന്നും അങ്ങനെ ആണല്ലോ...
തൊട്ടു മുമ്പ് സംഭവിച്ചതാണ് എങ്കിലും ആലോചിച്ചു പോകണമല്ലോ 

ചികഞ്ഞെടുത്ത് ഒരുമിച്ചു കൂട്ടാന്‍ ...

കുറച്ചു സമയങ്ങള്‍ക്കു ശേഷം അവള്‍ അമ്മയോട് ചേര്‍ന്ന് മടിയില്‍
തലചായ്ച്ചു കിടന്നു കൊണ്ട് പറഞ്ഞു തുടങ്ങി... 

" അമ്മേ... അവസാനമായി ഞാന്‍ കണ്ടത് ആരൊക്കെയോ ചേര്‍ന്നെന്നെ ഒരു മുറിക്കകത്ത് അടച്ചിട്ടിരിക്കുന്നു... എനിക്ക് ചുറ്റും  പാത്രങ്ങളും ചട്ടികളും 

ഒക്കെയായി പലതും ഉണ്ട്... പലരും വന്നു ജനല്‍ പാളിയിലൂടെ എന്നെ നോക്കി 

എന്തൊക്കെയോ പിറുപിറുത്തും കൊണ്ട് പോകുന്നു..." 

"എന്തിനാവും അമ്മേ ന്നെ അടച്ചിട്ടിരിക്കുന്നേ...? നിക്കും അമ്മായിയെ പോലെ  ഭ്രാന്ത് ആയിട്ടാവുമോ... " ചോദ്യവുമായി അച്ചു ദയനീയമായി അമ്മയെ നോക്കി...

" ന്റെ കുട്ടിക്ക് ഭ്രാന്തോ... ന്തായീ പറയണതു മോളേ... അത് സ്വപ്നല്ലേ...  

ന്റെ കുട്ടിയതൊന്നും കാര്യാക്കണ്ടാ... മോള്‍ പിന്നെയെന്തോക്കെയാ കണ്ടേ..?"

മോളേ കുറച്ചു കൂടി അടുപ്പിച്ചു അമ്മ വീണ്ടും ചോദിച്ചു...

" അമ്മയൊറ്റക്കല്ലേ യെന്നുമെന്നെ കുളിപ്പിക്കാര്‍ ... സ്വപ്നത്തില്‍ കുറെ സ്ത്രീകള്‍ 

ചേര്‍ന്ന് എന്നെ കുളിപ്പിക്കുണ്... എന്റെ മേല്‍ അപ്പടി അഴുക്കാണ് ന്നൂം നല്ലോണം വൃത്തിയാവട്ടെ ന്നും പറഞ്ഞാ കുളിപ്പിക്കണേ... അതെന്താ അമ്മേ അങ്ങനെ...? "

"അത് സാരല്യ മോളേ... കുളിപ്പിക്കണതു നല്ലതല്ലേ... അവര്‍ക്കൊക്കെ 

മോളോട് ഇഷ്ടായിട്ടല്ലേ... വേറെ എന്തൊക്കെയാ മോള്‍ കണ്ടേ... "

അച്ചുവിന്റെ മുടിയിഴകളില്‍ മൃദുവായി തലോടി കൊണ്ട് അമ്മ അവള്‍ കണ്ട 

സ്വപ്നം വീണ്ടും ചികഞ്ഞു...

കുറച്ചു നേരത്തെ നിശബ്ദതക്കു ശേഷം അച്ചു പിന്നെയും പറഞ്ഞു തുടങ്ങി ..

" ഞാന്‍ അമ്പലകുളത്തില്‍ നിന്നും കുളിയൊക്കെ കഴിഞ്ഞു എന്നത്തെയും പോലെ ചവിട്ടുപടികള്‍ എണ്ണിക്കൊണ്ട് കയറി വരികയായിരുന്നു...
പതിമൂന്നാം പടി എത്തിയപ്പോഴേക്കും നിക്ക് രണ്ടു ദീസായിട്ടുള്ള വയറുവേദന അധികമായി തോന്നി ഞാന്‍ അവിടെ ഇരുന്നു... കുറച്ചു കഴിഞ്ഞപ്പോ  ന്റെ തുടന്മല്‍ എന്തോ അരിക്കണ പോലെ നിക്ക് തോന്നി... വല്ല ചേരട്ടയും മറ്റുമാകുമോ ന്നു നോക്കാനായി ഞാന്‍ കൈകൊണ്ടു ഒന്ന് തടവി നോക്കി... അമ്മേ... ശരിക്കും ഞാന്‍ ഞെട്ടിപ്പോയി... 

ചോര...!! കട്ട പിടിച്ച ചോര...!!! ന്റെ കയ്യില്‍ ന്നാള്‍ കത്തി കൊണ്ടപ്പോ വന്നങ്ങനത്തെ ചോരയല്ല... ഒരു തരം വഴുപ്പോക്കെയുള്ള ചോര..! ഞാനൊന്നു  മണത്തു നോക്കി... പിന്നെയൊന്നും നിക്ക് ഓര്‍മല്ല മ്മേ... പിന്നെ കുളിപ്പിക്കണതും മുറിക്കകത്ത്  അടച്ചിട്ടതും മാത്രേ നിക്കൊര്‍മ്മയോള്ളൂ.." ന്നും പറഞ്ഞു  തേങ്ങി തേങ്ങി അച്ചു വീണ്ടും ഉറക്കത്തിലേക്ക് വഴുതി വീണു...

അപ്പോഴും ഉറങ്ങാത്ത കണ്ണുകളുമായി ഉറക്കം നഷ്ടമാകുന്ന വരാനിരിക്കുന്ന 

രാപ്പകലുകളെ കുറിച്ചോര്‍ത്തിരിക്കയായിരുന്നു ആ പാവം അമ്മ...!!!